“Bu addımlar fransanın vasitəçi mövqeyini şübhə altına salır” (Video)
Son iki ayda Fransadan olan bir neçə bələdiyyə başçısının Azərbaycanın işğal edilmiş ərazilərinə etdiyi qanunsuz səfərlər ölkənin siyasi dairələrində ciddi narazılığa səbəb olub. Ekspertlər hesab edir ki, Fransa Ermənistan-Azərbaycan Dağlıq Qarabağ münaqişəsinin nizamlanması ilə məşğul olan ATƏT-in Minsk Qrupunun həmsədri olduğu halda bu ölkənin özünüidarətemə orqanlarının hərəkətləri ilk növbədə Fransanın vasitəçi qismində nüfuzuna ciddi xələl gətirir.
Ekspertlərin fikrincə, Fransa XİN tərəfindən qondarma rejimin tanınmaması barəsində verilən açıqlama qənaətbəxş xarakter daşımır. Bu ölkə BMT Təhlükəsizlik Şurasının daimi üzvü olaraq Azərbaycanın işğal olunmuş ərazilərindən ermənistan qoşunlarının çıxarılması barədə 4 qətnamənin müddəalarının dərhal və şərtsiz həyata keçirilməsi istiqamətində qətiyyət göstərmir. Üstəlik, yerli özünüidarəetmə orqanlarının bu kimi təxribatçı əməlləri Fransanın milli qanunları ilə də ziddiyyət təşkil edir.
Fransada bu il qəbul edilən yerli özünüidarəetmə orqanlarının xarici fəaliyyətinin hüquqi çərçivəsi üzrə imzalanmış sənədə əsasən, Fransa tərəfindən tanınmamış ərazi vahidlərinin separatçı qurumları ilə hər hansı şəkildə müqavilələr bağlamaq, səfərlər həyata keçirmək və birgə tədbirlər təşkil etmək qadağandır. Bu məsələ iki gün öncə Azərbaycan Xarici işlər Nazirliyinin Fransanın Azərbaycandakı səfirinə təqdim etdiyi etiraz notasında da qeyd olunub. Xarici işlər naziri Elmar Məmmədyarov fransanın Azərbaycadakı səfiri Aureliya Buşezlə bu məsələni ayaqüstü müzakirə etdiyini bildirib.
Fransanın şirkətləri Azərbaycanda dövlət sifarişi ilə həyata keçirilən çoxsaylı layihələrdə iştirak edirlə rvə by layihələrin dəyəri təqribən 2 milyard avroya yaxındır. Ekspertlər hesab edir ki, əgər Fransa Azərbaycana münasibətdə bu kimi mövqeyini sərgiləməkdə davam edəcəksə, Azərbaycan Fransa şirkətləri ilə əlaqələrini yenidən nəzərdən keçirə bilər.
