Tramp Avropadan ABŞ-a uçuşlara qadağa qoydu

Martın 11-də ABŞ Prezidenti Donald Tramp televiziya vasitəsilə xalqa müraciət edib.

Virtualaz.org-un məlumatına görə, Tramp öz çıxışında koronavirus (COVİD-19) infeksiyasının ABŞ ərazisində yarada biləcəyi təhlükənin qarşısının alınması məqsədilə təxirəsalınmaz tədbirlər davam etdirildiyini bildirib.

Koronavirusun aşkar olunduğu ölkələrdən gələn şəxslərin müayinəsi ilə bağlı zəruri tədbirlər həyata keçirildiyini vurğulayan Ağ Evin başçısı deyib ki, ixtisaslaşmış xəstəxanalar və laboratoriyalar xəstəliyin müayinəsi, həmçinin müalicəsi üçün müvafiq avadanlıqlarla və dərman preparatları ilə təmin edilib.

Prezident Tramp deyib ki, ölkədə koronavirusun yayılmasının qarşısını almaq üçün Ağ Ev növbəti 30 gün ərzində Böyük Britaniya istisna olmaqla Avropadan ABŞ-a gələn bütün uçuşlara və gəmilərə ölkəyə qadağa qoyub.

Bundan əlavə, Prezident Tramp qeyd edib ki, koronavirusun yayılmasından zərər çəkmiş müəssisələrə maddi yardım ayrılacaq və 50 milyard dollara yaxın kiçik biznes kreditləri veriləcək.

Təcili tədbirlər çərçivəsində Tramp, həmçinin əməkhaqqı vergisinin azadılması üçün addımlar atmağa çağırıb.

Bu arada Arizona ştatının qubernatoru Daq Dyusi ştatda fövqəladə vəziyyət elan edib. Bununla da, Amerikada koronavirusla bağlı fövqəladə vəziyyətin elan edildiyi ştatların sayı 24-ə çatıb.

Xatırladaq ki, ABŞ-da koronovirusa yoluxmuş insanların sayı 1300-ə çatıb. Onlardan 37 nəfəri ölüb. Koronavirusa yoluxma hallarının ən çoxu Vaşinqton (267) və Nyu-York (173) şəhərlərində qeydə alınıb.